Porsche Panamera 2010

بقلم بوهاني
لين الحين المدونة للبيع، وبما إننا ننطر الدلال يشرف بنتسلى ونجرب نسوق البورش البانيميرا.

البورش البانيميرا تعتبر سيارة فاخرة نزلت بالأسواق الخليجية عام 2010، لها أربع أبواب، وهي سيارة 8 سليندر وبسعة 4.8 لتر و4800 ولها ناقل ست سرعات تيربو، مع دفع رباعي.

وزن السيارة طنين، وطولها خمسة متر بمترين وارتفاع متر ونص.

سرعتها من 0 - 100 كيلو متر بالساعة تصلها في 3.8 ثواني

سرعتها من 0 - 160 كيلو متر بالساعة تصلها في 8.8 ثواني

سرعتها القصوى: 303 كيلو متر في الساعة مع التحكم الآلي

أما التحكم اليدوي فلابد من تجربته
وفي نفس الوقت لا تزال المدونة معروضة للبيع أو الدعمين المعنوي والمادي.

اليهم مع التحيه ...

بقلم بوفادي

-         كتله العمل الشعبي : صارلنا 6 اشهر ما عندنا سالفه الا انكم بتتحولون لـ((حشد)) ، خلاص عاد ترى والله محد درى عنكم تحولتو ولا قعدتوا .

-         احمد السعدون: تكفا بوعبدالعزيز انا واحد من الاف عشاقك ، اقولك بس ابيك ترتاح وتقعد بالنويصيب والشباب حواليك ، ترى وضعك الحين مثل احمد عجب لا انت قادر تاخذ وضع صح ولا تخلص بالقووووول.

-         خالد الطاحوس : اول شي  فصل دشاديش يديده ترى الكرش بلش يطلع ، وبعدين بالنسبه حق الصراخ من اول ماتشوف الميكرفون الاخ دلال ربيان .

-         صالح عاشور: يبيلك دوره في مركز البابطين ، لأن علاقتك بالألف واللام مو ذاك الزود  .

-         سعدون حماد: بالنسبه لأنتقالك حق الثالثه حبيت اقولك ان المايه حاميه هناك يا الحوت

-         محمد عبدالقادر الجاسم: دشيت السجن جم يوم وابتلشنا ... لو كنت معاهم بدواوين الاثنين جان ما خلصنا لي اليوم.

-         سلوى الجسار: ولا اقولج خلاص اخاف تزعلين

-         التحالف الوطني : مقركم اجار ، وجمعيتكم العموميه عددهم اقل من مساهمين جمعية السلام وما تمونون حتى على فراش بمجلس الامه ،  وكل يومين عندكم أمين عام صكيتوا على الهيئه العامه للشباب والرياضه ،كل هذا وبينكم ذبح مذابح عيل لو انتوا حزب العمال شبتسوون.

-         اللي مستقبل سمو الرئيس في برمودا :  شورتك ماخذه من شعبان عبدالرحيم.

-         خالد الشليمي : والله لو مو تسوي ندوات  لو تسوي مباراة لفربول ونادي الجهراء ما تشم المجلس

-         حسين الحريتي: مو راضي تصدق انهم ما راح يحطونك وزير خلاص عاد تكفا ارحمنا

-         فيصل المسلم: جنك ولهت على الجامعه

-         محمد الوشيحي: والله من صجك كاتب في مصر.... يعني بتصير ضغيط عليهم.

-         الحركه الدستوريه: ارحموا عزيز قوم ذل .....

-         العمل الوطني: ودي اعرف انتو جم واحد

-         علي الراشد: صج بتقدم برنامج في سكوب

جبار .. جايات للربع على حسابي

بقلم بوهاني

اليوم سوينا المدونة، ولين الحين محد دق يسومها.

أول موضوع بما إن إحنا ما عندنا فلوس، ليش الحكومة ما نزلت معاشاتنا لين الحين، فلسنا العيد لا باركت بدعاية الوطني، عسى ما دشيت دوانية وإلا يمعة إلا هدوا علينا اليهال عطونا عيدية وعطونا عيدية، ليش ما الوطني بدال ما يسوي إعلان يقول فيه حق الناس عطونا عيدية يعايد علينا.

ليش ما يعطونا معشاتنا مع المتقاعدين عشرة الشهر، وبعدين ليش كله الواحد من يداوم يقول متى أتقاعد؟

المشكلة اللي لين الحين محد عارفها بموضوع المعاشات إن وزير المالية حساوي، وعاد تخيل حساوي تأمنه على فلوس، لا وتقول له عطني فلوس مبجر .. يحليلك، ومسلم البراك الله يهداه وايد منهد على مصطفى الشمالي، ويوم قام يلعب معاه مان تو مان طاف خالد الطاحوس الفرعي وركب المقير وانتقل من مقاعد الاحتياط ودش الملعب، فالحين الشمالي يلعب برقابة لصيقة ولا أحمد عجب بعزه.

إلا على طرية الفلوس .. يقولون مكاين النوط اليديد وصلت المينا علشان خطة التنمية، لأن التمويل بيصير من الاحتياطي، والاحتياطي تحت الشمالي والشمالي حساوي، فالحكومة قالت لازم نطبع أنواط يديدة وكلنا بنستغي من شركات رولا، بيسونها مساهمة عامة يعني هم الحكومة تبينا نساهم غصب، وزين منو مجلس الإدارة؟

الله يبارك للعسكرين اللهم لا حسد، الواحد منهم ما خطت شواربه توه مدهن رقبته بزيت بو فيل من كثر ما يتلفت على نجومه، وياخذ معاش أكثر من أبوه اللي خادم أكثر من ثلاثين سنة ويحاتي يحيلونه تقاعد لأن توه صاير رئيس قسم، وبعدين شنو يعني رائد ياخذ أكثر من وكيل وزارة، شنو العسكريين قاعد يسوون زود عن باجي العالم.

أنا أبي كادر حق المدونين، خاصة اللي توهم فاتحين مدونة، لازم الدولة تدعمهم لأنهم قاعد يرفعون راس الكويت بالمحافل الخارجية، وممكن من الصندوق الملياري يعطونا بيزات، عاد أنا ما عندي مانع أوقف جدام مجلس الوزرا وأقول حق الوزرا واحد واحد قراراتكم عجيبة عطونا عيدية، ولا وفق كل هذا هم مستعد أفتر وأزفن بس خل يعايدون علينا، لكن وين .. وزير المالية حساوي مثل اللي حاطينهم بالدعاية، اليهال مستانسين بالعيد وأهلهم مقلدمين.

أنا أقول لو الحكومة تقضب كل رب أسرة ويعطونه بيده نص مليون دينار ويقولون له ابتلش بأجيالك القادمة اهي تفتك وإحنا نفتك.